Ang resumé ay naglalaman ng mga
kredensiyal ng isang aplikanteng umaasang
magkaroon ng trabaho.
Ang employer naman ang nagbabasa ng
resumé at pumapanayam sa aplikante upang
malaman kung karapat-dapat siyang tanggapin ng
kompanya.
Ngayon, sa kolehiyo, ay tinuturuan kami
ng tamang paggawa ng resumé upang maging
kahanga-hanga ito sa mga mata ng employer
bagamat alam namin na sa taas ng unemployment rate
ngayon, masuwerte na kami kung sa pagtatapos ng
pag-aaral ay makakahanap pa kami ng employer na
magbibigay-pansin sa aming resumé at papalaring
tanggapin sa trabaho.
Ilang buwan na lamang ang nalalabi para
ipagbunyi namin ang pagtatapos ng pag-aaral sa
kolehiyo. Maraming mga magulang ang umaasang
maiaahon na sila sa kahirapan ng kanilang mga
anak. Ngunit kasabay nito ang pagtaas muli ng
unemployment rate. Madaragdagan na naman ng libu-
libo ang mga taong maghahanap ng trabaho sa
classified ads ng mga diyaryo, sa internet, sa job fair, o
sa mga call centers. Ibabalita na naman sa telebisyon
kung ilang milyong Pilipino ang wala pa ring
trabaho. Pagkatapos ay iaanunsiyo nila na samu’t
saring trabaho ang nag-aantay sa mga Pinoy sa
Australia, Canada, Middle East at kung saan
pang lupalop ng mundo. Idagdag pa ang patuloy
na pagbubukas ng mga call center maging sa lupa
mismo ng itinuturing na premyadong unibersidad
ng bansa. Tila parang hinihakayat pa ang mga tao
na maglingkod sa mga dayuhan.
Natapos na naming isulat ang aming
mga resumé at masayang sinabi ng aming guro na
mahusay ang pagkakagawa namin. Eh ano naman?
Sigurado bang magkakaroon kami ng trabaho?
Saan? Sa call center? ▪
Mimah Bartolome